Parklarımız yaz aylarında sakinlərimizi xoş qarşılamağa hazırlanır- Fəvvarələr təmir olunur, su hövzələri təmizlənir
Prezidenti cənab İlham Əliyevin diqqət və qayğısı sayəsində rayonumuzda aparılan genişmiqyaslı abadlıq-quruculuq işləri sürətlə davam etdirilir, problemlərin aradan qaldırılması üçün məqsədyönlü işlər görülür.
Hazırda isə Şəmkir sakinlərinin yaz aylarında xoş istirahətini təmin etmək üçün şəhər ərazisində yerləşən bütün parklarda fəvvarələr təmir olunur, sıradan çıxmış hissələri yeniləri ilə dəyişdirilir.
KMK-dan bildirilir ki, təmir-bərpa işləri Mərkəzi Şəhər Parkında, Xəqani İbrahimov Parkında aparılır.
Fəvvarələrin təmiri ilə yanaşı Mərkəzi Park ərazisindəki susuz qalmış və yararsız hala gəlmiş su arxları, parkın dizaynına uyğun qurulmuş hövzələr təmizlənir və bərpa olunur.
Rayon sakinləri, eləcə də şəhərimizin qonalarının daha çox sevdiyi, istirahətə gəldiyi parklar yaz, yay aylarında sakinlərimizi tam işlək və xoş istirahətlə qarşılayacaq.
Məlumat üçün bildirək ki, bu gün şəhərimizin küçələrində, park və xiyabanlarda təmizlik işlərinin aparılması və yaşıllıqların qorunması işləri də uğurla davam etdirilir.
Belə ki, şəhərin mərkəzi hesab olunan Heydər Əliyev prospektində yaşıllıqların qorunması üçün su xətləri bərpa olunub, su görməyən yerlərə yeni su xəttləri çəkilib.
