Şəmkirdə Ulu Öndər Heydər Əliyevin anadan olmasının 99 illiyi ilə əlaqədar mini futbol turniri keçirilir
06 may 2022 | 17:29
Şəmkirdə Ulu Öndər Heydər Əliyevin anadan olmasının 99 illiyi ilə əlaqədar mini futbol turniri keçirilir
Şəmkir Rayon İcra Hakimiyyətinin təşəbbüsü, rayon Gənclər və İdman İdarəsinin təşkilatçılığı ilə “İdeal Arena”da ulu öndər Heydər Əliyevin anadan olmasının 99-cu ildönümünə həsr olunmuş mini futbol turnirinə start verilib.
Açılış mərasimində Şəmkir Rayon İcra Hakimiyyəti başçısının birinci müavini Süleyman Zeynallı, rayon Gənclər və İdman İdarəsinin rəisi Emin İsmayılov, UGİM-nin direktoru Namiq Mahmudov, turnir iştirakçıları və idmançılar iştirak ediblər.
Çıxış edənlər Ümummilli Lider Heydər Əliyevin həyat və fəaliyyətindən, zəngin irsindən söz açaraq, müstəqil Azərbaycanın qurucusu kimi gördüyü işlərdən geniş danışıblar. Bildirilib ki, Ulu Öndər Heydər Əliyevin siyasi kursunun layiqli davamçısı, Prezident cənab İlham Əliyevin ölkədə apardığı siyasət Azərbaycanı dünyada günə-gündən qüdrətli ölkəyə çevirməkdədir.
Həmçinin turnirin rəsmi açılış mərasimində, AFFA-nın təşkil etdiyi uşaq futbolu çempionatında Şəmkir rayonunu təmsil edən, zona yarışının qalibi olaraq Respublika turnirinə vəsiqə qazanan Şəmkir rayon Gənclər və İdman İdarəsinin UGİM-nin U-10, U-12 komandalarının azyaşlı futbolçuları təltif edilib.
Bu münasibətlə uşaq futbolçulara hədiyyələr təqdim edən Şəmkir rayon İcra Hakimiyyəti başçısının birinci müavini Süleyman Zeynallı idmançıları təbrik edərək, onlara növbəti yarışlarda daha yüksək nəticələr əldə etmələrini arzulayıb.
Qeyd edək ki, ulu öndər Heydər Əliyevin anadan olmasının 99-cu ildönümünə həsr olunmuş mini-futbol turnirində ümumilikdə 8 komanda iki qrupda mübarizə aparır.
Keçidlər
