Rəşad Tağıyev "Şərq Ulduzu" MMC-də işlərin gedişatı ilə tanış olub
Şəmkir Rayon İcra Hakimiyyətinin başçısı Rəşad Tağıyev “Şərq Ulduzu” MMC-də, müəssisədə görülən işlərin gedişatı ilə yerində tanış olub.
Müəssisə ilə tanışlıq çərçivəsində icra başçısı bildirib ki, bu gün regionların inkişafı sahəsində qəbul edilən və uğurla həyata keçirilən dövlət proqramlarında nəzərdə tutulan vəzifələrin icrası ölkədə sosial infrastruktur təminatının keyfiyyətinin yüksəldilməsinə, sahibkarlıq mühitinin daha da yaxşılaşdırılmasına, investisiya qoyuluşunun artmasına, yeni müəssisələrin və iş yerlərinin açılmasına, nəticədə, əhalinin məşğulluğunun artırılmasına təkan veribdir. Bir sözlə, ölkəmizdə regionların inkişafı üzrə həyata keçirilən islahatlar və qəbul edilən dövlət proqramları bu sahənin tərəqqisi istiqamətində həyata keçirilən tədbirlərin sistemliliyini təmin edibdir: “Prezident cənab İlham Əliyevin dövlət başçısı kimi regionların sosial-iqtisadi inkişafı ilə bağlı gördüyü işlər nəticəsində ölkəmizin bütün bölgələri kimi, Şəmkir rayonu da inkişaf edərək, simasını dəyişib”.
“Şərq Ulduzu” MMC-də görülən işlərdən danışan müəssisənin rəhbəri Əsgər Alırzayev icra başçısına məlumat verib ki, 2002-ci ildə təməli qoyulan şirkət müasir texnologiyanın tətbiqini və yüksək keyfiyyətli məhsulların istehsalını qarşısına məqsəd qoymuşdur.
Ə.Alırzayev bildirib ki, alman layihəsi əsasında qurulmuş zavodda montaj və quraşdırma işləri Almaniyanın GWEİN şirkəti tərəfindən aparılmışdır. Emal sexində quraşdırılmış Fransanın BUCHER VASLIN şirkətinin istehsalı olan daraqayıran və xırdalayıcının istehsal gücü saatda 40 tondur. BUCHER VASLIN-in istehsalı olan vakum membran presin üstün xüsusiyyəti ondan ibarətdir ki, üzümün toxumunu və qabığını mexaniki zədələmir və proses qapalı şəkildə olduğundan şirənin oksidləşməsinə şərait yaratmır.
Müəssisə rəhbəri onu da qeyd edib ki, “Şərq Ulduzu” MMC qədim Azərbaycan mədəniyyətlərindən biri olan şərabçılığın nüfuzunu bütün dünya ölkələrinə çatdırmaq üçün səylə çalışır. Şirkət yaxın gələcəkdə yeni üzüm bağları salaraq yerli texniki üzüm sortlarının sayını artırmaq niyətindədir. Bununla yanaşı şampan şərabı və grappa da istehsal planına daxildir.
