Qazax – Tovuz Regional Təhsil İdarəsinin yeni rəhbərinin təqdimatı keçirildi
2021-ci ilin dekabrın 20-də Prezident cənab İlham Əliyev “Azərbaycan Respublikası Təhsil Nazirliyinin strukturunun təsdiq edilməsi haqqında” 2010-cu il 27 dekabr tarixli 1251 nömrəli və “Azərbaycan Respublikası Təhsil Nazirliyinin strukturunun təkmilləşdirilməsi haqqında” 2014-cü il 24 iyul tarixli 664 nömrəli sərəncamlarında dəyişiklik edilməsi barədə” sərəncam imzaladı.
Sərəncama əsasən, Təhsil Nazirliyinin regional idarələri yaradıldı.
Bu gün Şəmkir rayonunda Qazax – Tovuz Regional Təhsil İdarəsinə yeni rəhbər təyin edilmiş Arslan Hacıyevin təqdimat mərasimi keçirilib.
Təqdimatdan öncə Azərbaycan Respublikası Təhsil nazirinin müavini Muxtar Məmmədov, Şəmkir Rayon İcra Hakimiyyətinin başçısı Rəşad Tağıyev Ümummilli lider Heydər Əliyevin Şəmkir şəhərinin mərkəzində yerləşən abidəsini ziyarət ediblər.
Daha sonra nazir müavini, RİH başçısı və regionun təhsil işçilərinin iştirakı ilə Arslan Hacıyevin təqdimatı olub.
Nazir müavini çıxış edərək Təhsil Nazirliyi sistemində idarəetmənin təkmilləşdirilməsi ilə bağlı dövlət başçısı tərəfindən imzalanmış sərəncamlar, bu sərəncamların icrası ilə bağlı görülən işlərdən danışıb, Arslan Hacıyevə yeni işində uğurlar arzulayıb.
Şəmkir RİH başçısı Rəşad Tağıyev də öz növbəsində Arslan Hacıyevi təyinatı münasibətilə təbrik edib, regionda təhsilin inkişafı üçün bilik və bacarıqlarını əsirgəməyəcəyindən əmin olduğunu bildirib.
