Qasımalılar kənd ağsaqqalları Şanlı Qələbəyə, Qalib Xalq adına görə Ali Baş Komandan İlham Əliyevə minnətdarlıq etdilər
26 may 2022 | 09:19
SAKİNLƏRLƏ SƏYYAR QƏBUL-GÖRÜŞ
Şəmkir Rayon İcra Hakimiyyətinin başçısı Rəşad Tağıyev Qasımalılar kəndində sakinlərlə səyyar qəbul keçirib.
İcra başçısı görüşdən öncə kəndin Vətən müharibəsi şəhidi Nadirli Nadirin məzarını ziyarət edib.
Sakinlərlə görüşdə rayon rəhbəri Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində xalqımızın qazandığı şanlı Zəfərdən danışıb, qələbənin əhəmiyyətini vurğulayıb.
İcra başçısı bildirib ki, müharibə şəraitindən çıxmış bir dövlət olmağımıza baxmayaraq, regionların sosial-iqtisadi inkişafına böyük diqqət yetirən dövlət başçısının hərtərəfli qayğısı sayəsində ölkəmizin hər yerində olduğu kimi Şəmkir rayonunda da aparılan abadlıq və yenidənqurma işləri davam etdirilir.
Rəşad Tağıyev ölkə rəhbəri tərəfindən həyata keçirilən bu tədbirlərin və görülən işlərin bundan sonra da davam etdiriləcəyini, vətəndaşlarımızı narahat edən ən kiçik problemin belə diqqətdən kənarda qalmayacağını vurğulayıb.
Daha sonra vətəndaşların müraciətləri, istək və təklifləri dinlənilib, sakinlərlə kəndin ümumi problemləri müzakirə olunub.
Tədbirdə iştirak edən Qasımalılar kənd ağsaqqalları Vətən müharibəsində qazanılan Şanlı Qələbəyə görə Müzəffər Ali Baş Komandan İlham Əliyevə minnətdarlıq etdilər. Kənd ağsaqqallarından Eyvaz Ələsgərov bildirdi ki, Ali Baş Komandanımızın rəhbərliyi ilə biz artıq dünyada Qalib Xalq kimi tanınırıq: “Ahıl yaşımızda Xilaskar sərkərdəmiz bizə bu sevinci yaşatdı. Buna görə Şəmkir ağsaqqalları adından təşəkkürümüzü bildirir, tarixə xalqımızın adın qızıl hərflərlə yazan Ali Baş Komandanımıza can sağlığı arzulayırıq”.
Qeyd edək ki, RİH başçısının rayonun kənd və qəsəbələrində səyyar görüşləri davam edir və bütün yaşayış məntəqələrində sakinlərlə yerində görüş keçiriləcəkdir.
Keçidlər
