Milli Qəhrəman İsgəndər Aznaurovun büstünün açılış mərasimi keçirildi
22 iyun 2023 | 17:17
Şəmkir rayonunun Kür qəsəbəsində Azərbaycanın Milli Qəhrəmanı, şəhid İsgəndər Aznaurovun adını daşıyan 1 saylı tam orta məktəbin qarşısında ucaldılmış büstünün əsaslı təmirdən sonra açılış mərasimi keçirilib.
Tədbirdə Şəmkir Rayon İcra Hakimiyyətinin başçısı Rəşad Tağıyev, Milli Məclisin deputatı Qənirə Paşayeva, Dünya Ahıska Türkləri Birliyinin (DATÜB) rəhbərliyi və nümayəndələri, Türkiyənin Gəncədəki Baş Konsulluğunun əməkdaşları, Milli Qəhrəmanın ailə üzvləri, şəhid ailələri və qazilər, eləcə də İsgəndər Aznaurovun döyüş yoldaşları və ictimaiyyət nümayəndələri iştirak ediblər.
Açılış mərasimində Ümummilli lider Heydər Əliyevin, eləcə də Azərbaycanın ərazi bütövlüyü və suverenliyi uğrunda həlak olan şəhidlərimizin xatirəsi hörmət və ehtiramla yad edilib.
Çıxış edənlər əslən Ahıska türkü olan, el arasında “Topçu İsgəndər” kimi tanınan İ.Aznaurovun döyüş yolundan bəhs edib, onun Birinci Qarabağ müharibəsində topçu olaraq göstərdiyi qəhrəmanlıqlarından danışıblar.
Qeyd olunub ki, İsgəndər Aznaurov 1956-cı il avqustun 16-da Özbəkistan Respublikasının Buxara vilayətində anadan olub. 1980-ci illərin sonlarında Fərqanədə milli zəmində baş verən məlum hadisələrdən sonra bir çox ahısqa türk ailəsi kimi onların ailələri də Azərbaycana pənah gətirib və Şəmkir rayonunun Kür qəsəbəsində məskunlaşıblar. 1992-ci ildən Azərbaycan Ordusunda könüllü olaraq zabit kimi xidmət edən İsgəndər Aznaurov Gədəbəy rayonunun Şınıx bölgəsində erməni quldur dəstələrinə qarşı mərdliklə vuruşub, Mutludərə, Ər dağı, Ləzgi daşı və digər strateji yüksəkliklərdə şəxsi şücaət nümunələri göstərib.
Bildirilib ki, 1993-cü ildə şəhid olan İsgəndər Aznaurova yalnız iki il sonra ulu öndərimiz Heydər Əliyevin Fərmanı ilə Azərbaycanın Milli Qəhrəmanı fəxri adı verilib.
Dövlət İsgəndər Aznaurovun xidmətlərini yüksək qiymətləndirib. İndi onun adına yaşayış məntəqəsi, küçə və məktəb var. Vaxtilə döyüşdüyü səngər bu gün “İsgəndər qalası” adlanır və igid oğullarımız bu qalanın keşiyində ayıq-sayıq dayanaraq düşmən hücumlarının qarşısını mərdliklə alırlar.
Milli Qəhrəmanın ailə üzvləri çıxış edərək, göstərilən diqqət və qayğıya görə təşəkkür edib, bu gün də Azərbaycan əsgərinin hər qələbə sorağından qürurlandıqlarını bildiriblər.
Keçidlər
