Şəmkir rayonunda 9 may “Qələbə Günü” qeyd olunub

Qələbə günü münasibətilə keçirilən ümumrayon tədbirinin iştirakçıları əvvəlcə 1941-1945 muharibəsi zamani həlak olanların xatirəsinə ucaldılan abidə kompleksini ziyarət edib, gül dəstələri düzüblər.

Tədbirdə çıxış edən Şəmkir Rayon İcra Hakimiyyətinin başçısı Alimpaşa Məmmədov qələbinin təmin edilməsində soydaşlarımızın göstərdiyi qəhrəmanlıqlardan danışıb. Bildirib ki, azərbaycanlılar müxtəlif qoşun növlərində xidmət etməklə öz vəzifə borclarını şərəflə yerinə yetirib düşmənə layiqli cavab veriblər.

Həmçinin, bildirilib ki, hər bir müharibə veteranın döyüş təcrübəsi onların keşməkeşli həyat yolu gənclərimizə örnək olmalıdır.

İcra başçısı qeyd edib ki, müstəqil Azərbaycanın banisi Ulu Öndər veteranlara hər zaman böyük diqqət və qayğı göstərib: “Bu cəsur insanların öz həyatları bahasına faşizmin məhv edilməsinə verdikləri əvəzsiz töhfələr dövlət tərəfindən yüksək qiymətləndirilib. Ali Baş Komandan cənab İlham Əliyevin müdrik siyasəti ilə tezliklə düşmən tapdağı altındakı torpaqlarımız geri qaytarılacaq, Azərbaycanın dövlət bayrağı Qarabağın işğal olunmuş bütün rayonlarında qürurla dalğalanacaq və xalqımız Şuşada qələbə bayramını qeyd edəcək”.

Veteranlar da öz növbəsində onlara göstərilən diqqət və qayğıya görə dövlət başçısına və rayon rəhbərliyinə minnətdarlıq ediblər.

Tədbirin sonunda Şəmkir RİHB-nin başçısı, hüquq mühafizə orqanlarının rəhbər şəxsləri, RİH-nin əməkdaşları, idarə və müəssisələrin rəhbərləri, Şəmkir veteranları, ictimaiyyət nümayəndələrinə N saylə hərbi hissənin əsgərləri tərəfindən əsgər süfrəsi açılıb.

Qeyd edək ki, 1941-1945-ci il müharibəsində Şəmkir rayonundan 8 mindən çox soydaşımız iştirak edib. Onların yarıdan çoxu canını qurban verib. Hazırda Şəmkirdə 12 müharibə veteranı yaşayır.