Şəmkirdə YAP-ın yaranmasının 29-cu ildönümü qeyd olunub
Şəmkirdə Yeni Azərbaycan Partiyasının yaranmasının 29-cu ildönümünə həsr olunan tədbir keçirilib.
Tədbirdə Şəmkir RİH başçısı Rəşad Tağıyev, YAP Şəmkir rayon təşkilatının sədri Fəxrəddin Vəliyev, rayonun hüquq mühafizə orqanlarının rəhbərləri və partiya fəalları iştirak ediblər.
İştirakçılar əvvəlcə Azərbaycan xalqının ümummilli lideri Heydər Əliyevin abidəsini ziyarət edib, abidə önünə tər çiçəklər düzüblər.
Daha sonra ulu öndər Heydər Əliyevin və vətənimizin azadlığı uğrunda canından keçmiş şəhidlərimizin əziz xatirəsi dərin ehtiramla yad edilib.
Tədbirdə çıxış edən Rəşad Tağıyev Azərbaycanın ictimai-siyasi həyatında müstəsna rola malik Yeni Azərbaycan Partiyasının 29 ildə qazandığı uğurlardan bəhs edib.
İcra başçısı bildirib ki, ulu öndər Heydər Əliyevin yaratdığı partiya ötən illər ərzində siyasi sabitliyin və davamlı inkişafın təminatçısı kimi çıxış edərək qısa müddət ərzində ümumxalq partiyasına çevrilib. Bu gün bu siyasətin Prezident İlham Əliyev tərəfindən uğurla həyata keçirilməsi nəticəsində sürətlə inkişaf edən Azərbaycan mühüm nailiyyətlər qazanır.
Tədbirin sonunda Şəmkir şəhərində yerləşən Şəhidlər Xiyabanında ağacəkmə aksiyası keçirilib.
