KOSTİTUSİYA GÜNÜ ŞƏMKİRDƏ TƏNTƏNƏ İLƏ QEYD EDİLDİ

Ümummilli lider Heydər Əliyevin müəllifi olduğu ilk milli Konstitusiyanın qəbulu müasir tariximizin ən mühüm hadisəsi olmaqla yanaşı, həm də Ulu Öndərin Azərbaycan dövlətçiliyi qarşısında əvəzsiz xidmətlərindən biridir.

Bu münasibətlə Azərbaycan Respublikası Konstitusiya Məhkəməsi, Təhsil Nazirliyi və Şəmkir Rayon İcra Hakimiyyətinin birgə təşkilatçılığı ilə Şəmkir Heydər Əliyev Mərkəzində bayram tədbiri keçirilib.

Tədbirdə Şəmkir Rayon İcra Hakimiyyətinin başçısı Alimpaşa Məmmədov, Azərbaycan Respublikası Konstitusiya Məhkəməsinin Konstitusiya Hüquqları şöbəsinin müdiri Dürdanə Məmmədova, Konstitusiya Məhkəməsinin nümayəndələri, Qazax, Ağstafa, Tovuz rayonlarının icra hakimiyyətlərinin nümayəndələri, rayonun hüquq-mühafizə orqanlarının rəhbərləri, media işçiləri və ictimaiyyət nümayəndələri iştirak ediblər.

Bayram tədbirində Konstitusiya Məhkəməsi tərəfindən keçirilən Konstitusiya Gününə həsr olunmuş “Hüquqi dövlətin əsasları” adlı hüquq olimpiadasının qaliblərinə kubok, diplom və xatirə hədiyyələri təqdim olunub.

Eyni zamanda bayram münasibətilə Azərbaycan Respublikası Konstitusiya Məhkəməsinin Konstitusiya Hüquqları şöbəsinin müdiri Dürdanə Məmmədova və ədalətin təmin olunmasında xidmətləri olanlar Şəmkir Rayon İcra Hakimiyyəti tərəfindən mükafatlandırılıb.

Tədbirdə çıxış edən Şəmkir Rayon İcra Hakimiyyətinin başçısı Alimpaşa Məmmədov bütün Azərbaycan xalqını şəmkirlilər adından Konstitusiya Günü münasibətilə təbrik edib, şagirdləri hüquq və vəzifələrini dərindən dərk etməyə kömək olacaq belə bir olimpiadanın təşkilinə görə Konstitusiya Məhkəməsinin rəhbərliyinə və əməkdaşlarına minnətdarlığını bildirib. Bu bilik yarışının şagirdlərin həyatında mühüm rol oynadığı qeyd edən icra başçısı, olimpiada iştirakçıları arasından ölkəmizə və dövlətimizə layiqli kadrlar yetişəcəyinə əminlik ifadə edib.