İCRA BAŞÇISI BİR GÜNDƏ İKİ KƏNDDƏ VƏTƏNDAŞLARI QƏBUL EDİB

Şəmkir Rayon İcra Hakimiyyətinin başçısı Alimpaşa Məmmədovun vətəndaşları yerlərdə fərdi şəkildə qəbul etməsi, onları narahat edən məsələləri dinləyib və həlli istiqamətində tapşırıqlar verməsi artıq bir ənənə halını alıb.

Hər zaman sakinlərin qayğı və problemləri ilə maraqlanan icra başçısı bu gün Əliyaqublu kəndində 58, Tatarlı kəndlərində isə 13 nəfər kənd sakininin müraciətini dinləyib.

Qəbuldan əvvəl həm Əliyaqubluda, həm də Tatarlı kəndində sakinlərlə səmimi söhbət edən Alimpaşa Məmmədov bildirib ki, Cənab Prezident İlham Əliyevin siyasətindən bəhrələnərək əsas məqsədimiz vətəndaşlara layiqli xidmət etməkdir.

Alimpaşa Məmmədov sakinlərlə söhbətində bildirib ki, bu gün xalqımızın sosial müdafiəsinin təmin edilməsi Azərbaycan dövlətinin qarşısında duran strateji vəzifələrdən ən vacibidir:
“Cənab Prezident İlham Əliyev hər zaman bildirir ki, dövlət siyasətinin mərkəzində Azərbaycan vətəndaşı dayanır. Azərbaycan vətəndaşının maraqları Cənab Prezident üçün hər şeydən üstündür”.

Daha sonra vətəndaşların müraciətləri dinlənilib.
Keçirilən qəbullarda sakinlər tərəfindən səsləndirilən müraciətlər su, qaz, sosial yardım, işıq dirəklərinin yenilənməsi, mübahisəli torpaq məsələsi barədə olub.

Fərdi qəbulda bır sıra məsələlər yerindəcə həllini tapıb. Digər problemlərin həlli aidiyyatı qurumlar tərəfindən nəzarətə götürülüb.