Şəmkirdə Bədən Tərbiyəsi və İdman Günü qeyd edildi

Bu gün Şəmkir rayon Gənclər və İdman İdarəsinin konfrans zalında 5 Mart “Bədən Tərbiyəsi və İdman Günü” münasibətilə Şəmkir idmançıları ilə görüş keçirilib.

Tədbirdə Şəmkir Rayon İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Aynur Abdullayeva, Şəmkir rayon Gənclər və İdman İdarəsinin rəisi, YAP Şəmkir rayon Gənclər Birliyinin sədri Emin İsmayılov, Şəmkir rayon Gənclər və İdman İdarəsinin nəzdində fəaliyyət göstərən Uşaq Gənclər İdman Məktəbinin direktoru Namiq Mahmudov, həmin məktəbin məşqçi-müəllimləri və idmançıları iştirak ediblər.

İlk öncə Azərbaycan Respulikasının Dövlət Himni səsləndirilmişdir.

Tədbiri giriş sözü ilə açan Şəmkir rayon Gənclər və İdman İdarəsinin rəisi Emin İsmayılov tədbir iştirakçılarını salamlamış və 5 Mart “Bədən Tərbiyəsi və İdman Günü” münasibəti ilə idmançıları təbrik edib. İdarə rəisi Emin İsmayılov vurğulamışdır ki, bu tarix Azərbaycan Respublikasının Prezidenti İlham Əliyevin “Bədən tərbiyəsi və idman günü”nün təsis edilməsi haqqında 2005-ci il 4 mart tarixli Sərəncamına əsasən qeyd edilir. Azərbaycanda Bədən Tərbiyəsi və İdman Gününün martın 5-də qeyd olunması təsadüfi deyil. Məhz 1995-ci il martın 5-də ulu öndər Heydər Əliyev Bakı İdman Sarayında dünya və Avropa çempionatlarının qalibləri və mükafatçıları ilə görüşüb, İdman Fondunu təsis edib, bədən tərbiyəsi və idmanın inkişafında yeni strategiyanın təməlini qoyub. Prezident İlham Əliyevin 1997-ci ildə Azərbaycan Milli Olimpiya Komitəsinə rəhbər seçilməsindən sonra ölkəmizdə idmana və bədən tərbiyəsinə diqqət daha da artırılıb.

Bu gün Azərbaycanın dünyanın idman mərkəzlərindən birinə çevrildiyini böyük fəxrlə söyləmək olar. Dövlətimizin başçısının idmanı sevməsi, idmançılara xüsusi həssaslıqla yanaşması, yeni Olimpiya İdman komplekslərinin və idman bazalarının yaradılması haqqında qərarları ölkəmizdə idmanın kütləviləşməsinə əlverişli şərait yaradıb.

Çıxış edən Şəmkir Rayon İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Aynur Abdullayeva Şəmkir idmançılarını rayon rəhbərliyi adından salamlayaraq idman bayramı münasibəti ilə hər bir idmançını təbrik edib. Azərbaycanda əsası ulu öndər Heydər Əliyev tərəfindən qoyulmuş idmana, gənclərimizin sağlamlığına yüksək diqqət və qayğı siyasətinin Prezident İlham Əliyevin rəhbərliyi ilə uğurla davam etdirildiyi diqqətə çatdırılıb.

Daha sonra çıxış edən məşqçi-müəllim Mikayıl Sadıqov idmançılara göstərdiyi diqqət və qayğıya görə ölkə Prezidenti cənab İlham Əliyevə və rayon rəhbərliyinə təşəkürünü bildirib.

Yekunda Şəmkir rayonunda 2018-ci il ərzində yüksək nailiyyətlər əldə etmiş idmançılar diplom və xatirə hədiyyələri ilə təltif olunub.