"ŞƏMKİR BİZƏ CANIMIZ QƏDƏR ƏZİZDİR" - ALİMPAŞA MƏMMƏDOV

Şəmkir Rayon İcra Hakimiyyətinin başçısı Alimpaşa Məmmədov  daha bir səyyar qəbul rayonun Ağlavaşlı kəndində keçirib.

Görüşdə yerli sakinlərlə səmimi söhbət edən Rayon İcra Hakimiyyətinin başçısı Alimpaşa Məmmədov rayonda aparılan abadlıq və yenidənqurma işlərindən, əhalinin sosial problemlərinin həlli istiqamətində həyata keçirilən tədbirlərdən və bu sahədə qarşıda duran vəzifələrdən ətraflı danışıb.

İcra başçısı qəbulda Şəmkir və şəmkirlilərə olan sonsuz sevgisindən də danışıb: “Bu gün sizi narahat edən məsələlər bizi daha çox işləməyə, çalışmağa məcbur edir. Çünki hər birimiz Şəmkiri çox sevirik. Hər bir şəmkirli bilsin ki, bu rayon bizə canımız qədər əzizdir. Şəmkirə və onun dəyərli sakinlərinə canımız da qurbandır”.

Daha sonra Ağlavaşlı kəndində yaşayan sakinlərin şikayət və təklifləri dinlənilib.

Qəbulda qaldırılan məsələlərin bir qismi yerindəcə həllini tapıb, digər problemlərin həlli istiqamətində rayon rəhbəri tərəfindən əlaqədar qurum və təşkilat rəhbərlərinə tapşırıqlar verilib və onların həlli nəzarətə götürülüb.

Rayon sakinləri əhalinin problemlərinin həlli məqsədilə yerlərdə keçirilən səyyar-qəbul görüşlərdən razı qaldıqlarını qeyd edərək, göstərilən diqqət və qayğıya görə ölkə başçısına öz minnətdarlıqlarını bildiriblər.

Qeyd edək ki, Prezident İlham Əliyevin tapşırıq və tövsiyələrinə uyğun olaraq keçirilən görüşlərin məqsədi sakinlərin problemlərini öyrənmək və onları həll etməkdir.